CSC-SY

اللي خلاني حط هالموضوع هو التصويت عن تعريب البرامج وشفت انو اغلب الشباب والصبايا هون (اللي هنن أساسا من طلاب الكلية) كانوا ضد اللغة العربية بالمعلوماتية لذلك حبيت حط رأيي بالموضوع ونسمع آراء البقية....

للأسف اللي شفتو انو ما بس الأعضاء بيفضلوا يقروا IT بالانكليزي ويستعملوا البرامج بالواجهات الانكليزية .. الموضوع وصل لدرجة رفض اللغة العربية بالـ IT تماماً!

طيب ليه..؟؟ المشكلة هي انو هالعلم وصل لعنا متأخر وفي شوية كتب تم تعريبها! ومن هون كانت بداية تكوين الصورة الرافضة للغة العربية بالـ IT

• العدد القليل كتير من المراجع اللي بتستخدم اللغة العربية بالـ IT
• الترجمة السيئة جداً للكتب الموجودة بشكل عام (مع بعض الاستثناءات القليلة جدا)

انا بفضل اني استعمل البرامج باللغة الانكليزية وبفضل اقرا المراجع بالانكليزي، بس شو المشكلة اذا كان في شي مرجع منيح بالعربي انو نقرا فيه؟

عادة الترجمة ما بتكون منيحة لأنو المترجم اما بترجم بالحرفية أو بيستخدم مصطلحاتو الخاصة فيه اللي ممكن ما حدا يفهمها وبدها glossary مرفق مع كتاب لتعرف تقراه

في قاموس للمصطلحات بالجمعية العلمية السورية للمعلوماتية، بس بصراحة ما بعرف مين اللي مترجم المصطلحات... لأنو الوضع صعب كتير وما فيها شي مفهوم وما بتعبر عن المصطلح الانكليزي بالمرة... وللأسف صاروا الشباب كل ما حبوا يغيروا جو شوي يفتحو مسرد المصطلحات ويضحكوا شوي على كم ترجمة منو

حاولنا مرة نفكر انو نترجم شوية كتب انكليزية ولو كانت صغيرة كبداية (من رتبة 150 صفحة)... بس القصة بدها تفرغ شوي.. وكلشي بتتطلبوا هالقصة فهم الفقرة منيح وترجمتها وتغيير طريقة صياغة بعض الجمل في حال الضرورة لحتى تكون مناسبة للغة العربية ومفهمومة وكمان المترجم يحط المصطلح الانكليزي بجانب العربي في حال الضرورة!!! (طبعا اكيد بدها ناس فهمانة تماما كل الكتاب اللي عم تترجمو ومشتغلة بالمجال اللي عم ترجم فيه)

أما بالوضع الحالي فصعب نعتمد على العربي... بس المفروض نحنا نبلش بالموضوع لأنو نحنا أكتر ناس فهمانين شو معاني هالمصطلحات وهالكتب موجهة لناس متلنا مختصين بهالمجال وبالتالي منعرف كيف المفروض تطلع صياغة الكتب...

وبعدين في كتير أشياء تانية غير المراجع متل ترجمة البرامج... وأبسط مثال linux ubuntu... نزلت الـ arabic package for gnome مبارح مشان شوف كيف الترجمة... طلعت الكلمات مترجمة بالحرف... وفي منها ما فهمتها أبداً... يعطيون العافية اللي مترجمين هالنسخة بس صارت متل واحد عمل بحث طويل وقضى فيه سنين وبعدين حطو على الرف! ما حدا رح يستخدم هالترجمة لأنها سيئة بشكل عام

ما رح طول أكتر من هيك! يا ريت نسمع آراءكون بهالموضوع!

لاحظ أنه عنوان موضوعك :

شارك بالنقاش حول واقع اللغة العربية في الـ IT

لاحظ أن IT هو اختصار ل Information Technology

هل اختصاصك هو تكنلوجيا المعلومات ، باعتقادي لا

هناك فرق بين دراستك كمهندس معلوماتية و بين كونك تقني معلومات

و بالتالي من هنا تنبع مشاكل التعريب ، عدم وجود تعريف متفق عليه لمصطحات علوم المعلوماتية بشكل عام

وبالتالي نحن العرب كمستخدمين للتقنية و ليس كمنتجين لها سوف تواجهنا مشاكل كبيرة في مجال التعريب

لاحظ أنه في لغات البرمجة الغرضية التوجه ، كلمة CLASS

تترجم الى ( فئة - صف ... ) ، أما بالانكليزية فهي كلمة وحيدة CLAss

هو أحلى نهفة أنو عنوان الموضوع فيه إنكليزي

 شو قصة العنوان... انا فتحت الموضوع مشان تنتاقش فيه! ما نعلق على العنوان

عنوان الموضوع ما دخلو بدراستي بغض النظر شو هي!! فأنا دارس في مجال المعلوماتية!

كتب mpcabd:

هو أحلى نهفة أنو عنوان الموضوع فيه إنكليزي

وشو المشكلة؟ انا ما قلت بدي الغي الانكليزي لأنو ما النا غنى عنها لا هلأ ولا بعدين بالقرن الجاية... بس قلت انو المفروض نتحرك لنحسن نوعية وكمية المحتوى العربي بهالمجال

يا ريت تكون الردود ايجابية شوي وانا طرحت موضوع نقاشي! ما موضوع تنكيت يا شريك

أنا مو غرضي من الرد أنو علق على العنوان أنت فهمت ردي غلط

أنا الغرض من الرد يلي حطيتو أنو نشوف كيف المصطلحات الانكليزية لهذ العلم بالذات ممكن تختلف من شخص لآخر و حتى في وسط الدارسين لهذا العلم ، بينما باعتقادي هذه الأمور في الدول التي تتداول اللغة الانكليزية محسوم

وبالتالي قصة ( التعريب ) صعبة شوي ، اللغة العربية ليست لغة التكنلوجيا و بالتالي عندما يأتي مترجم ليس له علاقة بالمعلوماتية و يطلب منه في دور النشر أن يترجم كتب بهذا الاختصاص شوف التخبيص يلي بيصير يعني أنا عندي كتاب من الدار العربية للعلوم مترجم الى العربية و هو يتحدث عن C# و هو من انتاج MicroSoft Press

قوي بس لما بتقرا الترجمة بتحس حالك عم تقرا بعلم آخر

و بالتالي نقاشي ايجابي

وأنا نقاشي إيجابي كمان, بس حبيت بلشو بضحكة خفيفة منشان ما نمل
بالنسبة إلي مع فأنا ماني صحبة مع العربي, لا من ناحية الاستخدام بالمجال الحاسوبي ولا بالتعلم بخصوص هالمجال, لكن في بعض الكتب يلي قريتها بزماني لتعلمت كانت عربية وكانت متميزة, فالتعريب مو دائما ً سيء, أنا بشهد أني اتعلمت على كتب عربية وبدايتي كانت كلها عربية, حتى الـ Visual Basic .NET اتعلمتو بالعربي, حتى الـ OOP. لكن المشكلة تكمن في اتباع الغالبية الساحقة من المترجمين للترجمة الحرفية وعدم اعتمادهم مصدر واحد للترجمة وتعريب بعض الكلمات.
أنا من زمان كنت كمان أحتار ببعض الأسماء, بس إذا بتلاحظو أنو نحنا منحس شركة Microsoft هي أكتر وحدة عرفانة تعرب برامجها, بجوز السبب لأنو هي كانت أول البرامج العربية يلي اتعاملنا معها. وبناء ً عليه فهالشركة مقدمة ملف فيه ترجمات الكلمات لللغات كلها وإحداها العربية:

هي مبادرة حلوة بس رأيي من رأي mpcabd عنوانك in english

I Agree 100%

Nice Avatar BTW

هو طبعآ لازم يكون في إتفاق
و لأنوا الوطن العربي كبير صعب يصير إتفاق بس مانو مستحيل هي أول مشكلة
تاني مشكلة أنو في مصطلحات الناس تعودت عليها و ملا معنى عربي دقيق أو مالا معنى أبدآ لأنوا أحيانآ بتكون على إسم أشخاص أنتجوا الشي المسمى بإسمهم
بس إنشاء الله نقدر نتخطى هالمصاعب

مرحباً
هاذه أول مشاركة لي في هاذا الموقع الأكثر من راءع
و أحببت أن تكون مشاركتي الأولى في هاذا الموضوع تحديداً لأنني من المهتمين جداً باللغة العربية و تحديداً الفصحى منها
شكرا للسيد The Tornado المحترم على هاذا الموضوع القيم و لي عودة بمشاركة جديدة معبراً فيها عن رأيي فيما يخص هاذا الموضوع الهام لا بل الهام جداً
ولكن أتمنى أن يكون الموضوع جدي فمثلاً الأخ هناك أحب أن يرمي بدعابة أو ما شابه فكتب بالانكليزية و هناك الأخ عبر عن رأيه بالانكليزية (لغة الاستعمار) معتقداً أنه قد ختم العلم بمعرفته لهاتين الكلمتين !

كلنا منعرف انو لغة هالعلم هي الانكليزي

كتبت بموضوع التصويت اني قريت مقالة كانت عم تحكي عن الترجمة باسبانيا

عدد الكتب المترجمة سنويا للغة الاسبانية (من دون الكتب المؤلفة) أكبر من الكتب المترجمة للعربية من العهد العباسي حتى اليوم!!!

مرتين ترجمت مقالتين وحدة عم تحكي عن NET. والتانية كانت عم تحكي عن ++C وما شفت الموضوع بهالصعوبة وقدرت اني اوصل لصيغة مفهومة وواضحة

ومشان مجمع اللغة العربية! بتصور انو المفروض المجمع ما يتدخل أساسا بالترجمة وانما بس يراجع الترجمة للمصطلحات للتأكيد على انو الترجمات كلها صحيحة من حيث استخدام المفردات...

نيزو قباني بدك تطول بالك شوي .. شو هي لغة الاستعمار؟؟  

طيب ليش لما بيترجمو كتب أو مراجع أجنبية أو حتى مقالات ما بيبقو على المصطلحات متل ماهي بدون ما يغيروها أو يلاقو مقابلها بالعربي...
بما أنو الشرح ممكن يكون وافي وواضح بالعربي، والتعقيد عم يجي من الترجمة الحرفية للمصطلحات، فأنا بلاقي أنو مافي مشكلة تكون مقالة عن موضوع معين مترجمة بشكل واضح مفهوم، وتكون المصطلحات موجودة بالأجنبي، بما أنو هالمصطلحات هي رح يتم الاحتكاك فيها أكتر من نظيرتها المعربة...
بالنهاية الهدف هو رفع المحتوى العربي مقابل غيره، وليس إلغاء اللغات الأخرى مشان العربي.

الحل برأيي هو جعل المصطلح الانكليزي الغير قابل للتعريب الى عربي مثال :

فمثلا المجمع العربي للغة عرب Televesion الى الرائي ولم تنجح

لكن الكلمة المستعملة هي تلفزيون هي كلمة انكليزية معربة

وكما نعلم جميعا Format = فرمتة

هذه نفس الطريقة التي استعملها الغرب عندما نقلت علوم العرب في الاندلس الى الغرب و أثناء الحملات الصليبية

وكلمة sequential بتترجم لـ تتابعي ، وتسلسلي .. وشو ما بدك !

برأيي اللي قوي بالانجليزي ما يتعب حالو بقراءة مراجع مترجمة للعربي

 لإنو بدنا نعترف إنو قد ما ترجمت وعرّبت .. بتضل القراءة بلغة أهل العلم أفضل .. والكلمة صامدة أكتر !
ومع كترة المراجع الانجليزية .. الحل بيكون بالقراءة بالانجليزي .. ومجبر أخاك لا بطل ..

اهتمام واضح

لاأحد ينكر أهمية تعلم اللغات على أنواعها و خاصة الإنكليزيّة فهذا يساعد على التعلم و الاستفادة من كافة أنحاء العالم ...
و لكن إنّ ما يكتب بالعربيّة هو الأفضل و هو الأقوى لأنّ ذلك يوفر على المتعلم الوقت و الجهد بالإضافة إلى أنّه أقرب إلى تفكيره و مصطلحاته ..
أمّا بالنسبة لسؤالك عن الترجمة فمن وجهة نظري أنّ السبب في قلّة الترجمة ليس الصعوبة بل أنّ العرب أصبح لديهم عقدة نقص و لم يعد لديهم ثقة إلاّ باللغة الغريبة فأنا على ثقة لو أنّك خيّرت شخصاً بين موضوعين أحدهما بالعربية و الآخر بالإنكليزيّة فسوف يختار اللغة الأجنبية و بقلك " ما لي ثقة بأي شيء عربي لأنو العرب متخلفين و لح بيضلوا هيك " و طبعاً هذا الحكي ما بيقتصر على اللغة بل فيك تلاحظوا يأي شيء بحياتك اليوميّة و خاصة لما بدك تشتري شي غرض من السوق فأنت تلقائيّاً بتبعد عن كل شيء عربي و بتدور على الأجنبي و حتّى لو كان أغلى لأنو ما لك ثقة بالعربي ..
بس إذا كان لا بدّ من إنو نرجع نعتمد على اللغة العربية بحياتنا فأنا من رأيي هذا الشيء يبدأ من هنا أي من المنتديات العربيّة
يعني لمّا فوت على المنتدى و شوف خص حاطط رد على موضوع ما باللغة الإنكليزيّة مدري ليش بصير دمّي بيفرك (( مع احترامي لكافة الشباب بالموقع )) بس يعني ما وجد كلمات كافية باللغة العربيّة يعبر فيها عن رأيه لحتّى يتّجه للإنكليزي ..
آسف على الأغطالة بس يعني مثل ما بيقولوا (( لازم بق البحصة ))

بمدونتي بالعادة بدون باللغة الانكليزي ..

عم فكر دوّن بالعربي...

انا برأي ما في داعي لتعريب البرامج وممكن يتم تعريب كتب مو برامج لانو يلي بدو يتعلم على البرامج ممكن ياخد البرنامج على العمياني يعني انا اول مابلشت بwindows 98 وهاد يلي اشتغلت فيه بالـأول و كنت اكبس الزرار على الشكل مو على اللغة (على العمياني) وبسنة وحدة تعلمت وفهمت كل شي مع انو على جيلنا كانت اللغة من صف الخامس(وقت اجا الكمبيوتر على البيت) مو متل هلئ الصلاة على النبي اللغة من صف الاول والكتب بتشهي الواحد يدرسها ومشان هيك اللغة العربية براي مالها اي طعمة ب البرامج الجاهزة اما الكتب التعليمية شي تاني ممكن بعض استثنائات بس يلي بعرفو انو اي طالب IT بدور على مرجع عربي بكون مصيف سواء كان المطلوب (كتاب-برنامج-موقع-ضراب السخن) طالما المنبع موجود ليش لحتى ناخد من الفرع ونوع بمشاكل .
انا مرة كنت عم اشرح مشروع التخرج تبعي وكانت اللجنة من بيناتهم شخصين توقعط انو ما يفهمو كلمة كنت بدي احكيها قمت حاولت ترجمها وكانت الكلمة redundancy وماكنت لاي مرادف الها بالعربي قمت قلت وثوقية (انا عرفان ترجمتها غلط) قام قلي واحد من اللجنة هي مو هيك ترجمتها قمت قلتلو شو ترجمتها قام صفن وقلتلو مالها ترجمة بس بدلعوها وثوقية وكلهم ضحكوا وقتها مع انو انا نسلت عافيتي وقتها لاني كنت حابب عرب الشرح تعبي لأرضي كافة الازواق قمت انا اكلتها

والله خايف قول رأيي حاكم حسيت وصلتني طرطوشة بهالموضوع
أنا رأيي الشخصي انو عم بتعلم مشان شخصي مو مشان البشرية لأنو اذا بدي صلح بالمجتمع ( بعرف لازم صلح بحالي اول شي ) بدي ما لا يقل عن عمر او اكتر و بالتالي ما رح شوف نتائج شغلي و انا عايش وما كتير بيهمني شوف اسمي بكتب التاريخ .
ونفس الشي بينطبق عالعربي اذا بدنا نبلش نعرب مبدأيا رح نعزل حالنا عن العالم و يصير النا علم خاص و يلي بيسافر بيتغلب بألف قصة و قصة - متل مثلا الطب البشري عنا - مشان هيك بختار انو بتعلم بالانكليزي و بساعد حالي احسن ما كون جزء من محاولة نشر شغلة يمكن تطول كتير و يمكن ما تنجح اخر شي.
----
بعدين اذا بدنا الوطن العربي يتفق على مصطلحات هي لحالها بدها مليون سنة. لأنو معظم الجامعات العربية بغير سوريا بتدرس باللغة الانكليزية.

حسب اللي شايفه كل واحد عم يبدي رأيو , بس ......... برأيكم شو لازم تكون النتيجة من طرح هلموضوع و هلنقاش ؟؟؟

انو كل واحد يحكي رأيو
اذا لاقينا في افكار متقاربة فينا نشتغل عليها

تعريب البرامج شغلة مابدها سؤال!
أساساً ماحدا سألنا شركات البرامج الكبيرة المحترمة بتعمل نسخ معربة من برامجها.
بس عنا السوق يعرف "بالسوق الغبي" (مابيفرض رأيوا على المصنّع وانما العكس) مشان هيك ما منشوف كتير برامج معربة
بينما بأسواق تانية أصغر بكتير من السوق العربية بتلاقي كم أكبر من البرامج مترجمة للغة المحلية.
ليش تعريب البرامج وكلشي بيتعلق بمستخدم الكومبيوتر شغلة ضرورية لأنو الكومبيوتر والبرامج أدوات أساسية لازم الكل يستخدمها!
أما تعلم لغة تانية هي شغلة مو أساسية ومو شرط الكل يعملها.

أما تعريب علوم الكومبيوتر أو اي علم تاني فأكيد مفيد على المدى البعيد, بس مافي داعي لترجمة المصطلحات, يعني للأسف تراجع اللغة العربية هو بسبب غباء القائمين على احياء اللغة العربية
بالاضافة الى انو تخلف اي شعب بشكل عام اكيد بأدي الى تراجع لغة هالشعب.

على ذكر التخلف

مرة شفت على قناة DW-TV الألمانية برنامج مترجم الى العربية عن طالبتان ماليزيتان تريدان السفر الى ألمانيا بغية التحصيل العلمي
بحيث أنهما تقومان بتعلم اللغة الألمانية

الأولوية بالنسبة لهن تعلم اللغة العربية من أجل العلوم الدينية و خصوصا من أجل القرآن الكريم

و لكن أثناء البرنامج قالت المدرسة الماليزية و التي تقوم بتدريسهما الألمانية قالت :

اللغة الألمانية لغة التكنلوجيا بينما اللغة العربية ليست كذلك
ولذلك كانت تحضهما على زيادة تحصيل المعارف في هذه اللغة

كم أكرمنا الله عز وجل بأن أنزل كتابه بلغتنا وحفظ لنا اللغة و كم تراجعنا ببعدنا عن تعاليمه

يا جماعة التعريب ضروري مشان نحافظ على قيمة لغتنا و عراقتها
بس مو ضروري إذا عربنا شي نعرب المصطلحات
مثال : مصطلحات الكيمياء و رموزها بالغة اليونانية مع هالشي بنستخدم اللغة العربية فيها بس لما بنتعامل مع مصطلح لازم يضل على اللغة الأساسية تبعو لأنو تغيير مصطلح من لغة للغة بغير المعنى أحيانآ
يمكن أنا غيرت رأيي بهالموضوع بعد ما قرأت بعض الموضوعات وهالشي موغلط لأنو هدف الموقع هو النقاش مشان نطلع بنتيجة

http://www.aljazeera.net/NR/EXERES/669F52F2-F919-4AC8-A688-20E692342DE3.htm