CSC-SY

السلام عليكم و رحمة الله و بركاته
أنا طالب بكالوريا من الشام و حصلت 237 درجة و من ست سنين و أنا بدي المعلوماتية و ماشي لعندها
بس أهلي و رفقاتي جننوني بالطب تحت مئة حجة وحجة و أنا محتار ..
يا ترى رح حقق أحلامي بالمعلوماتية ؟ أو بيكون الطب أحسن ؟؟
رجــــــــــــــــــــــــــــــــــــــــاء أجيبوني

شوف هي تجربتي ممكن تفيدك (كتير شبيهة بحالتك):
http://www.csc-sy.net/node/3545
http://www.csc-sy.net/node/3582
وفي هدول المواضيع الحالية عن طلاب هالسنة:
http://www.csc-sy.net/node/8219
http://www.csc-sy.net/node/8214
http://www.csc-sy.net/node/8215

اتمسك بحلمك ولا ترد على حدا
ولك في mpcabd قدوة حسنة

ما بتخيل وحد بيحب المعلوماتية يكون عم يفكر لمجرد تفكير أنو يفوت على غير فرع ! بالنهاية لا البابا ولا الماما هن لح يدرسو !!!!

كلام (NightWolf) سليم 100%

وأنا كمان كان عندي نفس المشكلة بس القرار كان راجع إلي وبس ودخلت المعلوماتية حسب رغبتي 

حلمك طبعا...........بالنهاية إنت مالك صغير وصار لازم تحكم عقلك وتختار مجال دراستك المستقبلي على مسؤليتك الشخصية
طبعا كمان مالازم تغضب أبويك...........حاول تناقشهن وتقنعهن
والله يكتبلك يلي فيه الخير

برأيي ناقشها كالتالي

إذا أنت قادر على دخول الطب والإبداع فيه، وممكن تسافر وتختص برا وتحصل اختصاص عالي فهاد شي رائع ورسالة سامية

حلمك معلوماتية: رأيي تتعمق أكتر بالمعلوماتية وتشوف شو هي قبل ما تعتبرها حلمك

وشوف حالك أنت وين أكتر وإيم كلمة المعلوماتية الرنانة من اعتباراتك

المعلوماتية كفرع مجال الإبداع فيه كبير ورائع وفرص عملو جيدة بفضل الله

ومحل ما بتلاقي حالك ممكن تأبدع أكتر اتكل على رب العالمين

100 %

فوت طب ..

شو يعني حلمك المعلوماتية شو بتعرف عنها ...!!!
هاد الوضع أنا اتعرضت إلو من قبل وبالأخير اخترت رغبتي يلي هية المعلوماتية
بس متل ماقالولك من قبل إذا كان بإمكانك انك تفوت طب وتختص اختصاص امنيح وتســــــــــــــافــــــر لبرا البلد بتوقع انو الطب أفضل طبعا مابقلك إنو بالمعلوماتية مافيك تساوي هيك شيء
بس بالطب طريقك ميسر أكتر طبعا أهلك بيعرفو مصلحتك أكتر منك عنجد
بس بالأخير برأيي شوف وين عقلك بوديك و شو هية رغبتك بجد يعني فكر بالمستقبل مو بس بالشهادة و الدراسة فكر انت لوين بدك توصل وشو بدك تصير بالأخير ...

اذركر نفسي و اذكرك أيضا بأن تلجأ الى الله عز وجل وتسأله بأن ييسر لك الخير ، فالشيء الذي أنت مقدم عليه نقله نوعية في حياتك ، وجميعنا بحاجة الى توفيق الله عز وجل

إذا كنت قادر تتحمل مسؤولية خيارك و متأكد إنك مارح تندم لاحقا شو مصار إدخل معلوماتية و إلا بوجك على الطب .
من شان هيك لازم تسأل منيح و تستفسر و تعرف إنت وين أنسبلك .

انت اللي رح تدرس وانت اللي تتعب وانت اللي رح تتخرج وتشتغل وتنجح ان شاء الله

ما أهلك ولا اخواتك ولا اي حدا تاني بالعالم

ادخل الشي اللي انت بدك ياه وبس !! وتوكل على الله

الكلام اللي إنقال كلو صح.. (ماعاد في شي ينضاف)

بس بدي قلك لا تنسى تعمل إستخارة بعد ما تقررشو بدك تدرس.

والله يختارلك اللي فيه الخير...

الكلمة الذهبية .... مهندس ناجح أفضل بكثير من طبيب فاشل ....

هلأ من جميع النواحي لح قلك معلوماتية .....
لأنو أنت بتحبها أول شي ...
و لأنو المستقبل مفتوح على مصراعيه أمام كل مجالات المعلوماتية ....
و لأنو البلد بحاجة لمهندسي معلوماتية أكتر من الاطباء حالياً ....

و لأنو هاد مستقبلك و أنت اللي لح تعيشو و معظم الاهالي هلأ للأسف مو مقتنعين لسا بشي أسمو هندسة معلوماتية ..... بس أنت لازم تحاول تقنعهون بهالكلام حتى يقتنعو بوجهة نظرك و هيك بتحقق اللي بدك ياه و بترضي أهلك ....
أهلي كانو متل أهلك ..... بس الحمد لله أنو قدرت أقنعون بالأخير ....
بالتوفيق .....و الله يخترلك اللي فيه الخير

رح قلك متل الي سبقوني اذا حابب ترتاح دراسيا وماديا بعدين مالك غير الطب بس اذاحابب تشغل مخك وحاسس انو عندك قدرة ع الابداع فالمعلوماتية أحسن
على فكرة رفيقي235دخل معلوماتية بعد صراع مع أهلو ماسلك بالسنة الاولى متل العالم وشكلو هلق عم يفكر يرجع ع الطب
بالاخي اذا انت شايف حالك معلوماتية ودخلت طب ما رح تنجح متل الي داخلو عن رغبة
الخيار الك وأنت بتتحمل النتائج

والله أنا برأيي الاتنين مناح وأي كلية رح تفوتها لازمها دراسة وعلى هوا دراستك بتحدد مستقبلك وبعدين مو متل ما قالوا إذا درست طب برا يعني رح يكون مستقبلك أفضل هادا كله توفيق من عند الله
أنا فتت معلوماتية وأهلي ما كان بدهم بس أنا هلق كتير مبسوطة فيها بدك رأيي استخير رب العالمين وأكيد رح يدلك
الله يخترلك الخير وين ما كان

الشكر للجميع يا شباب
و الحمد لله أنا سألت و عم أسأل
و الحقيقة بالفعل و جدت إني ما بعرف شو هي كلمة المعلوماتية
و بعد دراسة للواقع و الظروف الخاصة التي أعيشها حيكون الطب أنسب و ميسر أكتر و طريقه بالنسبة إلي مشرق أكتر
وعم فكر خلي الكمبيوتر هواية لأني بالآخر ما بقدر أتخلى عن الكمبيوتر بالكامل
ألف شكر إلكم يا شباب و الله يجزيكم الخير .

هلأ في نقطة بأنو أهلك ما بدهن ياك تدخل غير طب..
هلأ أكيد هنن مابدهن يدخلوك طب إلا لغاية في نفس يعقوب، أصدي أنو كل أهل بيجبو يشوفو أولادهن بأعلى المناصب وبأحسن شغل..
وهنن من منظورهن الطب بيأمنلك هالشي هاد..
أنا من رأيي شوف شوهي المعلوماتية عن قرب اتعرف على موادنا أكتر مشان تاخد فكرة مسبقة عن الشي اللي رح تشوفو وتدرسو بعدين على مدة 5 سنين، لما بتقتنع بهالشي هاد.. بتقدر وقتها تقنع أهلك فيه، تقلهن على الكلية اللي بدك تفوت عليها، شو طبيعتها وشو مستقبلها.. وقتها هنن اللي رح يقولولك "لما يقتنعوا فيها" أنك تفوت عليها...انطلاقاً من الفكرة اللي قلتها قبل شوي:
كل أهل بيجبو يشوفو أولادهن بأعلى المناصب وبأحسن شغل
أنا برأيي تعمل هيك أحسن ما تدخل فرع هنن مو رايدينو، أو ما بدهن ياه..
وأولاً وآخراً:

ليس من تجربة خاصة ولكن من رؤية عن قرب:
الطب مشواره طويل جداً..... يعني ست سنين بالطب بتطلعك دكتور بدون اختصاص ودكتور بدون اختصاص متل كمبيوتر بلا موذر بورد يعني على الأقل الطب يحتاج إلى 10 سنين ركيد!!!!
أما بالمعلوماتية فأنت تتخرج مع اختصاص خلال خمس سنوات وماحدا قدك

أنت لازم تقارن وتشوف أنت كفو؟؟؟

كمان شغلة إنو الطب متعارف عليه وهي سمعتها مؤخراً إنو وعفوا عالكلمة (جحش دراسة) ومو حكي سامعته وإنما عم شوف بعيوني العيون عم تطلع!!!!

ومتل ما قالوا الرغبة ليست دائماً كل شيء
(عسى أن تحبوا شيئاً وهو شر لكم)
الله يكتب لك إلي فيه الخير

بس كأنو أنت قلت من ست سنين؟؟؟ يعني شلون لهلق ما سجلت جامعة؟

يعني لكل اختصاص أهميتو و ما في داعي نحط من شأن أي مهنة .....
المهم يكون الشخص ناجح بالمجال اللي اختارو ....
و إذا الواحد بحب شغلة أكيد لح ينجح فيها أكتر .....

بالنهاية الله يختار الخير للجميع ....

ههههههههه ... لك لاء مو هاد المعنى يلي لازم تفهميه
المعنى من الكلام انو انت مافيكي تقارني بين شخص ناجح وشخص فاشل
المقارنة بتكون بين شخصين ناجحين أو شخصين فاشلين

الكلام هون كتير حلوو
ومتل ما قالو أنو زبال ناجح أحسن من مهندس فاشل

والكلام كفَا و فَا على ما اظن بس الشغلة لازملا صفنة منيحة على الاخر مشان تئدر تقرر القرار المناسب

وكمان ما بعرف إذا بتستفيد من هل النصيحة
عميل متل ما عملت انا

قعود مع أهلك قعدة صفا و تناقشو ا بين بعض وأنت حاول توضح و جهة نظرك
وتوكل على الله

الظاهر أنت قررت بس بحب ضيف شي أنا ما رح اتحيز لفرعي كوني طالبة معلوماتية بس وقت كنت بكلوريا كنت احلم بالطب والصيدلي لان الناس بنظرهم ...مو لاني بحب كون طبيبة وبنفس الوقت كنت موت على الرياضيات وكل شي فيو تشغيل مخ ومابطيق حفظ العلوم وقدمت بكلوريا وما جمعت علامة تجيب الطب زعلت بوقتها بس وقت دخلت معلوماتية أنا بحمد ربي ليل ونهار لاني شفت رفقاتي بالطب وشفت حالي بالمعلوماتية يعني صحيح تعسرت بالسنة الاولى بس لاني حبيتها وكنت متوكلة على الله ما ندمت ابدا فبنصحك تسأل منيح وتعرف شو هي المعلوماتية وتوكل على الله لانو هو الوحيد يلي رح يكون جنبك حتى اخر عمرك واخيرا انت فرعك مكتبلك من وقت خلقت فكن مع الله .....موفق يارب

انا الحمد لله وبشكر الله انو اهلي متفهميني صح اهلي رغبتن صير صيدلي او طبيب بس بالاخير رجعولي مو صاروا يضغطو عليي يعني انا الحمد لله متفق مع اهلي عالمعلوماتية وكل الاقارب والاصدقاء بيقولو انو انا لازم فوت هندسة معلوماتية لانو انا مشهور بيناتون انو خبرتي بالكمبيورت كبيرة...

وانا برأيي اخي انو لازم تدخل الفرع يلي بتحبو....انت لازم كمان تحترم رأي اهلك

وتتناقشو بها الموضوع ....

وانشالله خير

خبرنا شو بيصير معك

حـــــيــــــــــــــــراااااااااااااااااااااااااان
قلت لأهلي إني خلاص دكتور و بس
بس لساتني عم فكر ....
و بصراحة سألت كتير و بالواقع يلي عايشو ما بظن المعلوماتية أحسن بكتير من الطب .
الحمد لله أنا مستعد أدرس كل شي من حفظيات و فهميات يعني بالفرعين ما في مشاكل
و صدقوني يمكن أفوت الطب عن قناعة تامة بالواقع السوري و الشعبي عندي بس كل ما مر أمام كلية المعلوماتية رح حس إني ظلمت حالي و حرقت قلبي بحجة الواقع و الأهل و الماديات و المعنويات و أكيد رح أتذكر وقتها أنو كان في شي من زمان اسمو الطموح
شكرا يا شباب و الرجاء زودوني بتجاربكم أنا محتاجكم

رح قلك أنو أنت لما قررت بالبداية تفوت طب و تجعل الكمبيوتر هواية عنجد هادا الحل كتير صح..
واحد بعرفو متلك طلعلو طب و كان له اهتمامات بالكمبيوتر و بيحب الرياضيات و الفيزياء..
دخل طب و الحمد لله ما ندم أبدا و كمان نما هواياتو بالكمبيوتر يعني يمكن إذا بدنا شي بالكمبيوتر بيعرف أحسن من مهندس..
فنصيحة فوت طب و ما بتندم.
و الكمبيوتر مو متل مو مفكر أنت انترنت و هالحكي .
ييعني الدراسة شي و أنك بتحب الكمبيوتر و ال.. شي تاني.
أنا هادا رأيي و تجربة واقعية حكيتلك ياها.
الله يخترلك الخير .
و السلام عليكم.