CSC-SY

على مشارف السنة الثانية لإلي بالكلية وفي نهاية السنة الدراسية الثالثة منها ساويت تقييم لهالسنتين وقارنت بين السنة الماضية والسنة هي وطلع ما يلي :

السنة الماضية دخلت عالكلية ما بعرف حدا إطلاقاً تفاجأت كتير بالمواد، بالجو الاجتماعي السيء للغاية خصوصي بالسنة تبعنا إضافة أني ما كنت فاضي منوب وبايع الكلية كلها وملتهي بالشغل يلي كان كمان جو جديد تماما ومضى الفصل الأول مدري شلون بنتيجة حمل أربع مواد ، بصراحة كان أسوأ فصل دراسي بحياتي كلها طبعاً اتعرفت أول الفصل على شلة أصدقاء قلال والحمد لله ما في منهم بس كنا ما نجتمع كتير وكانت الجية عالكلية متل يلي جاية على شي درس غصباً عنو و على فكرة صعب جداً تجي على جو إنت حاسس حالك غريب فيه...

الفصل التاني كان أفضل شوي بلشت احضر اتواصل مع العالم شوي وخصوصي أعضاء المنتدى هاد ويلي كان صلتي مع الكلية تقريباً والحمد لله قدرت انفد من السنة التانية ب 8 مواد وآخر السنة اتعرفت على جماعة السنة التانية هلق (يلي كانو سنة أولى ) ويلي كانو فعالين جداً بالمنتدى لدرجة مرضيّة هي السنة كانت أفضل بكتير من النواحي جميعها يعني كنت بعرف الشباب بعرف نظام الكلية شلون المحاضرات ، شلون العملي ، شلون دبر راسي بين الشغل والجامعة ونسق منيح وقتي هاد الحكي بالفصل الأول والحمد لله طلعت من الفصل الأول دون حمل أي مادة ، الفائدة الكبرى يلي لقيتها هو تعرفي على أصدقاء كتير بالجامعة صار بعضهم شوي شوي من أقرب الأصدقاء.وهلق الحمد لله مع الفحص العملي مالي خايف من أي مادة وعندي ثقة كبيرة بنفسي بالنسبة لكل المواد وكمان الحمد لله عم ننفد .. 

وجه المفارقة أنو هلق وبأواخر الفصل التاني صارو هالأصدقاء جزء أساسي كتير من نظام حياتي .. وبالتالي صارت الجية عالكلية هامة للغاية ، وصارت تتبدى على مشاريع تانية ضمن كل يوم . بين كون الشخص صديق دراسة وبين كونه رفيق فرق كبير كتير على سبيل المثال لا الحصر صرت اجي عالكلية سواء عندي شي ولا ما عندي منشان نجتمع و نتفق على شي طلعة - رحلة - سهرة - فطور أو اي نشاط آخر

حتى المسنجر يلي ما كان فيه حدا من الكلية صار هلق أكبر group فيه هو group الكلية واحيانا بس بفوت عالمسنجر منشان سلم عليهم !!

يلي ذكرني بهالموضوع هو هالموضوع يلي اتذكرت فيه الوضع السنة الماضية شو كان تعيس !!

بتوقع الواحد اذا بدو ينجح بالكلية لازم يكون على تواصل مع جو الكلية وهالتواصل ما حيتم إلا اذا كان في للواحد أصدقاء بحبهم وبيحسن يقعد معهم وما تصير الجامعة بس للدراسة بس ..وبصراحة هالسنتين ما بعتبرهم غير سنة وحدة يلي هي السنة التالتة. حبيت عن جد وبأول مدونة لإلي بموقع CSC اشكر كل يلي بيعتبرني صديق بالكلية وما ذكرت أسماء منوب لأنو ما بدي انسى حدا إطلاقاً وعن جد اتشرفت بمعرفة كل شخص فيكم وشكر خاص كمان لموقع CSC-SY يلي صرلو صفحتي الرئيسية سنة كاملة وأكيــــــد أكتر منتدى بحبه وبشارك فيه وبتمناله يكمل هالمسيرة الرائعة مع كل الصعوبات الحالية .

So Thanx A Lot My Friends Who Make The College A Place For Fun Too.